EDL do CEIP de Chancelas

Festival de Nadal. 2011

2011-12-22T02:14:00.000-08:00

Este ano fixemos un pequeno festival na nosa escola.
Todos os nenos e nenas saíron ó escenario para participar e divertirnos coa sua interpretación.
Tedes aqui unha mostra do noso traballo:
Unhas fotos (que podedes descargar)

e alguns videos das actuacions:
aqui están os de infantil

Outra vez os mais pequenos:

3º e 4º cunha panxoliña:

5º cunha obriña de teatro:

e aqui veñen 1º e 2º:

PROGRAMA DE RADIO ESCOLAR

2011-12-16T02:23:00.000-08:00

O CEIP de Chancelas sumouse este curso á iniciativa de Radio Tui de animación á lectura a través das ondas.
Grazas á invitación do CEIP A porteliña de Pazos de Reis, realizaremos diferentes programas de radio desde Chancelas.
Aqui tedes ó enlace ao primeiro programa, onde o alumnado de 6º presenta o libro de Pinto e Chinto "Contos para nenos que dormen deseguida"
PULSA NESTE ENLACE

Arte na Escola I

2011-12-13T04:15:00.000-08:00

Xa non é a primeira vez pero este curso temos a nosa escola chea de obras de arte. Miró, Dalí, Calder, Sorolla e moitos mais artistas están entre nos.
Mirade unha mostra, chegarán moitas mais.

Magosto do día 11 de novembro

2011-11-17T01:33:00.002-08:00

Nin a choiva nos impediu celebrar o magosto.
Lume!! e castañas para todos
E de remate concurso de peóns con diploma e todo.

O Sabelotodo 2011 xa está aquí

2011-06-07T07:27:00.000-07:00

Sen mais palabras, aquí tedes a revista do cole deste ano 2011.

Open publication - Free publishing - More chancelas

ÚLTIMA HORA

2011-06-06T04:15:00.000-07:00

Adianto informativo do que parece vai ser a portada do próximo número da revista escolar.
Por agora non temos máis datos pero coméntase pola escola que non vai tardar moito en saír.
En canto a teñemos nas nosas mans vos a teredes aqui.

Visita ó instituto de Poio

2011-06-01T08:04:00.000-07:00

Os nenos e nenas de 6º visitaron o iES de Poio, próximo destino dos seus esforzos... Algúns comentarios tras a visita:
"Coñeceremos novos amigos e atoparemos ós de antes" Ángel
"Os alumnos de 1º da ESO dixéronos que non iamos tardar en acostumarnos" Paula
"No instituto sentíame estraña e perdida porque era moi grande" Bárbara
" Alí tes que estudar moito para poder aprobar" Iván
"É moi grande cun extenso patio de recreo e dentro hai tantos corredores que parece un labirinto" Sergio
" Hai uns catrocento vinte alumnos e cinconta e tres profesores, mais libros, mais aulas...bueno, hai que estudar moito mais" Tomás
"Xa estou nervioso pola chegada e ter que deixar o cole..." Gabriel
"O que mais me sorprendeu é que as aulas son enormes" Francis

Sorte a todos na súa vindeira aventura.

SEMANA DAS LETRAS GALEGAS

2011-05-23T07:52:00.000-07:00

Esta semana pasada celebramos na escola uns días adicados á Semana das Letras Galegas.
O mércores fixemos un pequeno festival adicado as letras e a Lois Pereiro

O Xoves foi o día adicado ó cine en galego e vimos dúas películas: unha adicada ós mais pequenos "O rato Pérez" e para os maiores "Asterix e Obelix"

E o Venres recibimos a Susa Herrera e disfrutamos dun día de música

O Correlingua 2011

2011-05-10T12:21:00.001-07:00

Este ano participamos outra vez no Correlingua, un acto en defensa da nosa lingua que percorre toda Galicia. Mirade cantos nenos e nenas e que ben o pasamos

O Libro dos animais

2011-05-05T03:07:00.001-07:00

Precioso libro de animais feito polos mais pequenos do cole coa axuda das súas familias. Disfrutade.

Open publication - Free publishing - More animais

OS MAIOS

2011-05-02T03:10:00.000-07:00

Outro ano mais fixemos no cole o noso maio. Co traballo e participación de todo o alumnado fixemos o maio mais bonito do mundo enteiro...
Mirade:
Primeiro os de Infantil (lembra que premendo nas fotos vanse ampliar e as podes gardar)

E os de Primaria (Se non funciona podes premer no espacio en branco e irás directamente ás fotos)

Despois a montaxe:

E a festa no patio, onde cantamos as coplas.

Un saúdo, ata a próxima...

Xa é PRIMAVERA

2011-04-29T06:59:00.000-07:00

Todas estas flores están espalladas polo noso patio... no noso cole é primavera de verdade

LETRAS GALEGAS 2011 LOIS PEREIRO

2011-04-26T08:06:00.000-07:00

O Día das Letras Galegas adícase este ano ó poeta monfortino Lois Pereiro.
Toda a información ó respecto atópase nesta páxina da Galipedia e na súa páxina oficial .Podes consultar tamén a páxina
htpp://www.xunta.es/linguagalega/loispereiro.
Próximamente informaremos dos actos celebrados no seu honor na nosa escola.

Entroido en Chancelas

2011-03-17T01:11:00.000-07:00

Tedes aqui unha pequena mostra do que foi o noso entroido este curso: paseo ata a praza da Chousa, cancións e papatoria dos postres aportados polas familias na escola. Gracias a todos.

2011-02-21T01:22:00.000-08:00

Hoxe é o Día Internacional das Linguas Maternas. A nosa lingua necesita moitos coidados e hoxe é tamén un bo día para darlle agarimos.

Hoxe é San Valentin...dalle un bico

2011-02-14T01:38:00.000-08:00

Para todos os namorados, esta canción.

Esta é a súa idea de defender a nosa lingua

2011-01-17T00:13:00.000-08:00

Instituto de pontevedra critican a Telmo Martín, candidato do PP á alcaldía de Pontevedra polas súas declaracións sobre o galego. Noticia do Faro de Vigo.

Lembremos que Pontevedra é unha cidade galega e que afortunadamente moitos dos pontevedreses falan galego.

ULTIMA HORA

2010-12-23T02:12:00.000-08:00

Un ano mais (e van 4 seguidos) o noso belén acada o 1º posto no concurso de belens escolares do Concello de Poio.

Gracias a todos pola vosa axuda e colaboración.

O NOSO BELÉN

2010-12-22T01:53:00.000-08:00

Un ano mais o cole, coa participación das familias, construi o Belén.
Este nadal, seguindo o tema que nos impulsa este ano, foi adicado ó mar e representou a ría de Pontevedra coa localidade de Combarro e o nacemento está situado nunha cova ó pé da illa de Tambo.
Mirade as fotos e gracias a todos pola vosa participación.

O Magosto

2010-11-19T00:37:00.000-08:00

Aqui tedes unha mostra das fotos deste magosto do martes 16 de novembro no cole:

Xa chega o Magosto.

2010-11-09T08:50:00.000-08:00

Se o tempo acompaña celebraremos a tarde do vindeiro Martes 16 o magosto na nosa escola. Se non o podemos facer esa tarde xa atoparemos unha mañá, o caso é xuntarnos todos e celebrar o magosto.

Pero, queres saber moito mais sobre esta festa ?mira esta presentación que nos chega desde o IES As Lagoas de Ourense

Tempo De Magostos

Se aínda queres aprender algo mais:
Aquí tes a súa historia na Galipedia

Aquí poderás ler sobre a súa historia e actualidade

Pulsa agora aquí para ler unhas interesantes informacións sobre o noso castiñeiro

So se pode comer asada? non, mira aquí cantas posibilidades hai.

E, para rematar, unha recopilación de poemas , adiviñas e lendas do magosto.

E non tardarán en chegar a este blog as fotos deste magosto na escola...

Exposición: Nos tamén fomos emigrantes

2010-11-03T02:14:00.000-07:00

O alumnado de Infantil e 2º e 3º ciclo de Primaria do cole fomos estes días á sede naútica de Caixagalicia en sanxenxo para ver unha exposición de fotografías que recolle momentos da emigración galega. Como case todos temos alguén que estivo fora ou aínda segue, estas fotos nos interesaron moito.

Celebración do Samaín.

2010-11-03T01:22:00.001-07:00

Fixemos un acto escuro no salón de actos para celebrar o Samaín. Metía medo todo cheo de cabazas prendidas. Conto de medo, canción e mesmo unha actuación improvisada dunha mestra agachada pola escuridade... foi monstruoso!!

Cabazas do Samaín.

2010-11-03T01:14:00.001-07:00

Trouxemos moitas cabazas para o Samaín.

2010-11-02T09:23:00.000-07:00

Temos adornada a nosa Biblioteca. Agora, no Samaín, mete medo...

Xornada pola ciencia.

2010-10-19T08:17:00.000-07:00

Porque, en contra do que opina o decreto de galego da Xunta, na ciencia ten tamén cabida o galego
http://www.coordinadoraendl.org/cienciaengalego

Sabelotodo 2010

2010-06-18T05:07:00.000-07:00

Xa chegou, xa está aquí... a revista escolar deste curso, a mellor revista escolar do mundo enteiro... SABELOTODO 2010.

Open publication - Free publishing - More sabelotodo

10 razóns para falar galego

2010-06-17T02:49:00.000-07:00

Nais e Pais polo Ensino en Galego achegan un decálogo sobre por que os nosos cativos deberían aprender na nosa lingua. Non está mal lembrarllo aos pais -galego ou castelanfalantes- que teñan nas mans xa a enquisa de Educación.

http://www.elcorreogallego.es/adjuntos/documentos/20100616razons.pdf

Crisis? a Xunta tira os cartos

2010-06-15T22:42:00.001-07:00

190.000 libros de texto gratuítos para as familias, adquiridos polo goberno bipartito, van ir parar ao lixo, a pesar de teren unha vida útil de dous anos máis. Así o recoñece a propia Consellaría de Educación aos medios de comunicación que se fixeron eco da noticia. O motivo? Eses manuais están en galego e refírense a materias científico-técnicas cuxa docencia no noso idioma quere prohibir o goberno Feijóo a través do decretazo 79/2010.

Segue lendo no xornal Galicia Hoxe

1º premio do concurso de fotografía de ONS

2010-06-11T01:31:00.000-07:00

Esta mañá nos deron a boa noticia. Os de 5º gañamos o primeiro premio do concurso de fotografía que convocou o Parque Nacional Ilas Atlánticas entre os centros que visitaran este curso a illa de Ons...

A nosa foto recolle unha chamada para a conservación do corvo mariño, especie emblemática das illas Ons en perigo de extinción.

Recollimos pola praia materiais naturais: algas, paos, cunchas... e con eles fixemos a figura desta ave mariña.

Aqui nos tedes a todos posando co noso traballo.

Galegando dende o IES Pintor Colmeiro, Silleda

2010-06-02T07:59:00.000-07:00

trátase dun lipdub, un vídeo musical rodado nun plano secuencia onde a alumnado, nun divertidísimo playback, mostra o seu centro ao tempo que reivindica a nosa lingua dun xeito lúdico e positivo.

En Galego tamén se fai ciencia

2010-06-02T07:55:00.000-07:00

En galego tamén se fai ciencia é unha campaña proposta polas tres universidades galegas para fomentar o emprego do Galego nas ciencias, e é que aínda queda moito que demostrar e moita que normalizar no uso da nosa lingua.

En galego tamén se fai ciencia from En galego tamén se fai ciencia on Vimeo.

Artículos de Opinión sobre o "Decreto do Galego sen galego"

2010-05-24T07:49:00.000-07:00

Unha serie de artículos interesantes sobre o decreto:

Un do director do Xornal de Galicia.com "Poderase estudar galego sen falalo"

E outro de X.A Pérez Lema tamén do Xornal.com titulado "Seis verdades sobre o galego"

2010-05-24T07:44:00.000-07:00

Sen Comentarios...

Festival Letras Galegas

2010-05-24T07:18:00.001-07:00

O Venres pasado fixemos no cole un pequeno festival para celebrar o Día das Letras Galegas e conmemorar a figura de Novoneyra. Tivemos actuacións de varios cursos coa presentación da súa biografía por parte de infantil, cancións e recitados de poesía que remataron coa lectura do conto "Ilda, o lobo, o corzo e o xabarín" por parte dos membros do ENDL do cole apoiados nos debuxos do alumnado. Aqui tedes unha pequena mostra

Concerto da Semana das Letras Galegas

2010-05-19T11:36:00.000-07:00

Esta mañá a nosa dire e mestra de música, Magoia, e Pablo, tamén mestre pero doutro cole, regalaronos un concerto de música popula galega e nos ensinaron o nome e como se usan varios instrumentos tradicionais. Zanfona, gaita, charrasco e birimbao e non sei cantos mais. Todos pasaron polas súas mans e todos soaron moi ben... escoitade unha pequena mostra.

Tamén cantamos nos a adaptación musical dun poemiña de Novoneyra:

Mirade as fotos:

Chove pra que eu...

2010-05-14T03:42:00.000-07:00

Xa nos imos preparando, a vindeira semana celebraremos con diferentes actos as Letras Galegas e xa imos adornando o cole. O primeiro foi a entrada. Pingas de auga de cada neno e nena da escola completan cunha palabra ou cunha frase o verso de Novoneyra:
"Chove pra que eu soñe"

A Mochila Viaxeira desta semana

2010-05-09T09:28:00.000-07:00

Máis de 4.500 profesores advirten que “dan e darán as clases en galego”

2010-05-07T01:26:00.000-07:00

Noticia recollida no Xornal Dixital VIEIROS. 5/5/2010

A plataforma 'Queremos Galego' entregou este mércores no Rexistro da Xunta un documento que conta coa adhesión dos docentes.

Un paso máis que simbólico. A plataforma 'Queremos Galego' entregou este mércores no Rexistro da Xunta un documento asinado por 4.530 profesores de ensino non universitario no que expresan a súa vontade de seguir impartindo aulas na lingua propia do país e o seu rexeitamento á modificación do decreto. Dende a plataforma sinalan que decidiron pedir as sinaturas logo de que o Goberno anunciase que ía obrigar a impartir en lingua castelán materias como Matemáticas, Física e Quimica e Tecnoloxía.

Carlos Callón, presidente da Mesa pola Normalización Lingüística e voceiro de 'Queremos Galego' subliñou diante dos xornalistas que “estes son 4.530 alegatos contra a prohibición do galego e en defensa da aplicación dos consensos a que chegamos entre todas e todos” e “4.530 protestas contra o feito de que Galiza sexa a única autonomía do Estado onde se poderá expedientar unha profesora ou un profesor por impartir as aulas no idioma propio, algo que non acontece nin en Valencia, onde goberna o PP”.

O secretario nacional de CIG-Ensino, Anxo Louzao, que tamén participou na entrega das adhesións, sinalou que “se pretende trasladar a imaxe de que o noso é un idioma de segunda, que non pode ser vehículo normal”. Louzao e Callón salientaron o gran apoio do profesorado e sinalaron que aínda non rematou a recollida de sinaturas.

Maio, mes da lingua

2010-05-07T01:18:00.000-07:00

O SNL do Concello de Pontevedra e a rede de Entidades Amigas da Lingua (REAL) organizan Maio, Mes da Lingua, un programa de actividades arredor da lingua galega con exposicións, conferencias, teatro, etc.

Aqui tedes acceso ó programa.

Correlingua 2010

2010-05-06T03:04:00.000-07:00

Estámonos preparando para irmos o Correlingua deste ano o vindeiro martes en Pontevedra. Esperamos que nos faga bo tempo e poidamos disfrutar do percorrido e das actuacións na Praza da Ferrería.
Aquí vos queda o percorrido deste ano:

Ler e listo. Ler nunca caduca...

2010-05-06T00:20:00.001-07:00

Os maios no cole

2010-05-02T12:02:00.000-07:00

O pasado venres celebramos os maios no cole. Nos tamén fixemos o noso, as nosas coplas e aquí tedes unha mostra do resultado:

Mochila Viaxeira desta semana

2010-04-30T01:34:00.000-07:00

Estrenan maio coa súa mochila:

Semana das letras galegas UXÍO NOVONEYRA

2010-04-27T01:33:00.000-07:00

Chega a Semana das Letras Galegas adicada este ano ó poeta do Courel UXÍO NOVONEYRA. Neste bloque vos ofrecemos unha serie de ligazóns e actividades para coñecelo e traballar sobre o autor e a súa obra. Dentro duns días veredes os traballos e actos de celebración do noso cole.

A súa Bibliografía

Páxina web de Uxío Novoneyra

Enlace á páxina da Xunta con material diverso sobre o poeta e a súa obra.

Conto de NovoNeyra dende O Ceip de Frián-Teis

(premer na imaxe do conto)

Poema de Uxío Novoneyra interpretado por Emilio Cao

A árbore do Dia do libro

2010-04-23T03:57:00.000-07:00

Para a celebración do día do libro plantamos unha árbore. Esta iniciativa xurdiu dunha proposta do equipo de Biblioteca e na entrada desta fixemos una árbore de papel reciclado onde cada neno e nena da escola engadiu unha folla ou unha flor cun pequeno texto ou poema. Cada flor e cada folla foron premiados cunha doce sorpresa.

A Mochila desta semana

2010-04-23T01:33:00.000-07:00

Esta semana levan a Mochila Viaxeira:

O concerto do sábado

2010-04-20T04:06:00.000-07:00

Un exemplo da música coa que disfrutaron as mais de 7.000 persoas que asistiron o pasado 17 ó concerto de "Queremos galego"
Lamatumba...

Música pola defensa do Galego

2010-04-16T04:31:00.000-07:00

Festival de Queremos Galego

Quedan poucas horas para o Macroconcerto que a plataforma Queremos galego celebra mañá en Pontevedra. Será a partir das 19.30h no interior do recinto ferial.

Mais información.

Esta semana levan á casa a Mochila Viaxeira...

2010-04-16T04:24:00.000-07:00

O COLEXIO DE CHANCELAS XA TEN HORTA ESCOLAR

2010-04-14T02:44:00.000-07:00

O CEIP de Chancelas sumouse ao proxecto dos hortos ecolóxicos, co obxectivo de que os alumnos e alumnas coñezan de forma práctica o traballo agrícola e a orixe das hortalizas e verduras que comen e, ao mesmo tempo, estreiten vínculos coa natureza e adquiran un maior respecto polo entorno rural.

No centro contamos cunha parcela de 20 metros cadrados, na que nenas, nenos e profesores plantaremos diferentes produtos de tempada. Comezamos esta mesma semana.

Agardamos ter unha boa colleita para finais de curso.

Música contra o decretazo

2010-04-14T01:11:00.000-07:00

O vindeiro sábado 17 de abril celebrarase en Pontevedra un concerto musical organizado pola plataforma "Queremos Galego" contra o decreto de galego. Mais información aqui.

Viaxe a ONS

2010-04-12T03:16:00.000-07:00

O alumnado de 5º foi a pasada semana á Illa de Ons invitado polo Parque Nacional marítimo-terrestre das Illas Atlanticas de Galicia. Aproveitaron un espléndido día de sol para visitar e coñecer o parque acompañados por unha guía e mesmo chegou a tempo para divertirse nas súas praias. Un día moi aproveitado.
Mirade que ben o pasamos:

Mochilas Viaxeiras

2010-04-09T04:41:00.001-07:00

Dende xaneiro está a funcionar no cole a "mochila viaxeira". Esta experiencia plantexada e elaborada polo equipo da biblioteca, ofrece un novo vínculo entre as familias e a escola.

Nesta mochila un neno ou nena de cada clase leva a casa, cada fin de semana, algún libro, documental, película e revista. Para toda a familia, pequenos e maiores.

Adxuntamos tamén un "caderno de bitácora", pequena libreta onde apuntar e expresar as nosas recomendacións, ideas e suxerencias. Esperamos que as disfrutedes.

Esta semana levan a mochila:

Contra vento e marea

2010-04-09T01:37:00.000-07:00

Noticia de "La Voz de Galicia.es" hoxe venres 9:
Feijoo respecta a decisión do Consello escolar de Galicia pero seguirá adiante.

O presidente da Xunta asegurou respectar a decisión d Consello Escolar de Galicia, pero manifestou a sua intención de seguir adiante co texto e apostar pola convivencia das linguas e o seu equilibrio, así como por unha escola amable e equilibrada.
Feijoo indicou que a postura deste órgano de representación da comunidade educativa era previsible, e que os que están a favor do desequilibrio lingüístico teñen toda a a sua lexitimidade, da misma forma que o seu Goberno ten a lexitimidade de estar a favor do equilibrio entre o castelan e o galego. O responsable do Executivo asegurou que si hai algunha modificación máis que poida aceptarse se incorporará.

O Consello escolar de Galicia rexeita o borrador do Decreto do Galego

2010-04-09T01:25:00.000-07:00

O Consello Escolar de Galicia, órgano consultivo da comunidade autónoma, rexeitou a tarde do día 7 o borrador do proxecto do decreto do plurilingüismo no ensino non universitaria elaborado polo Goberno galego.
O decreto resultou desestimado despois de que prosperase, por 24 votos a favor e 16 en contra, a enmenda á totalidade contra o borrador do decreto.
A retirada do texto foi solicitada polos sindicatos CIG, UXT e Comisions Obreiras, e apoiada tamén pola Confederación de Asociacions de Pais de Alumnos de Centros Públicos (Confapa), dos Movementos de Renovación Pedagóxica, do Seminario de Estudos Galegos e das organizacions estudiantís.
Tal e como destacou Anxo Louzao, secretario xeral de CIG-Ensino, o borrador do decreto recibíu tamén os votos en contra dos alcaldes do PSdeG e do BNG con representación no Consello Escolar de Galicia.
Al final do pleno do Consello Escolar e en declaracions ós xornalistas, o secretario xeral de Política Lingüística da Xunta, Anxo Lourenzo, afirmou que a Administración gallega «acepta» a decisión do Consello Escolar de Galicia. Lorenzo refiríuse, sen embargo, á división posta de manifesto durante o pleno do Consello Escolar, e aludíu a «una parte que estaba disposta a seguir traballando sobre as modificaciones do texto do decreto para conseguir o maior consenso posible, e outra que decidíu votar en contra e non entrar a negociar».

Xornal.com: A Xunta gastará un millón de euros para divulgar "o valor do plurilingüismo" nas aulas

2010-04-06T08:41:00.000-07:00

Educación xa gastou 90.000€ a anunciar a consulta ás familias e casi 20.000€ a realizar as enquisas nos colexio.

As contas económicas do Goberno galego volverán recibir un forte impacto como consecuencia do denominado “decreto do plurilingüismo”, se ben desta volta os gastos non virán motivados da propia posta en marcha da nova norma lingüística e nin sequera afectarán ao orzamento da Consellería de Educación.

O pasado 31 de marzo, xornada previa aos días festivos da Semana Santa, a Secretaría Xeral de Medios –con dependencia xerárquica directa do presidente da Xunta, Alberto Núñez Feijóo– enviou ao Diario Oficial das Comunidades Europeas o “anuncio de información previa” dun contrato para pór en marcha unha “campaña institucional informativa e divulgativa sobre os novos valores do sistema de ensino non universitario na Comunidade Autonóma de Galicia”.

Na “natureza” do contrato que o Executivo autonómico asinará, o departamento dependente da Presidencia especifica que o obxectivo da acción propagandística será “dar a coñecer á poboación galega os novos valores do plurilingüismo nas aulas”, isto é, as caracterísicas do decreto que impulsa Educación e que mañá chegará ao Consello Escolar de Galicia no medio dunha intensa controversia educativa.

Igualmente, o documento remitido ao diario da UE especifica o “custo estimado” da contratatación, que se eleva aos 819.000 euros, “IVE excluído”. Unha vez engadidos os correspondentes impostos, é posible concluír que a Xunta desembolsará, cando menos, 950.040 euros. Se a formalización do contrato fose realizada despois do mes de xuño, momento no que o IVE se incrementará do 16% ao 18% en todo o Estado, o importe final ascenderá a, cando menos, a 966.420 euros.

Con todo, a cantidade que a Xunta está disposta a destinar a esta campaña aínda pode variar, dado que esta publicación no Diario Oficial das Comunidades Europeas é un trámite opcional, co mero valor dun aviso previo ás empresas interesadas en elaborar os anuncios. Así, a licitación definitiva da operación terá que ser anunciada no Diario Oficial de Galicia (DOG) e no Boletín Oficial do Estado (BOE) para, despois, regresar ao boletín comunitario, desta volta xa cun importe definitivo para o concurso público.

Así as cousas, o importe próximo a 1 millón de euros que a Presidencia da Xunta gastará en publicitar os “valores” do decreto engadirase aos 90.000 euros que, segundo recoñeceu no Parlamento o conselleiro da Presidencia, Alfonso Rueda, supuxeron para as arcas públicas as dúas xornadas en que a Consellería de Educación inseriu nalgúns diarios, durante dous días, páxinas publicitarias sobre a enquisa realizada entre as familias dos estudantes o pasado mes de xuño.

Ese desembolso sumouse, á súa vez, aos 6 céntimos “por alumno” que o departamento de Jesús Vázquez recoñeceu ter gastado na realización da enquisa, cunha suma total de 19.800 euros. Deste xeito, e á espera da realización das enquisas previstas no novo decreto, a mudanza da normativa lingüística suporá xa, cando menos, 1,06 millóns de euros ás arcas públicas de Galicia.

David Lombao, Xornal.com

O decreto para o plurilingüismo enfróntase mañá ao Consello Escolar

2010-04-06T08:36:00.000-07:00

Noticia de www.culturagalega.org

O Consello Escolar de Galicia, órgano que reúne pais, profesores, movementos de renovación pedagóxica e sindicatos entre outros, reúnese mañá para decidir o seu apoio ao proxecto de decreto para o plurilingüísmo no ensino. Malia ao rexeitamento de moitos dos representantes neste organismo, está aínda pendente de se verificar o pronunciamento final do mesmo, e é posible que o texto saia con diferentes enmendas da xuntanza. Nova Escola Galega, por exemplo, publicou xa un manifesto no que denuncia que a proposta do PP pode dar "na formación de dúas sociedades diferenciadas" por mor da lingua. A coincidir con esta xornada, a plataforma Queremos Galego convocou unha mobilización mañá ás 16.15h ante a sede deste organismo, na compostelá rúa de San Roque. Ao tempo, Xornal de Galicia revela hoxe que a Xunta fará unha campaña de publicidade para dar a coñecer "os novos valores do plurilingüismo nas aulas" valorada en preto dun millón de euros.

mais información http://www.culturagalega.org/noticia.php?id=16613

21 de marzo. Dia da Árbore

2010-03-23T03:03:00.000-07:00

A pasada semana celebrouse o Día da Árbore. O alumnado do terceiro ciclo fixo unha saída para plantar árbores nunha finca cercana á escola coa axuda do Concello e da Comunidade de Montes de Combarro. Antes de saír tivemos unha pequena charla e unha demostración práctica de discriminación de árbores e plantas. Á volta, despois de plantar as árbores fixemos unha parada na Cuna da Moura. Non sabes onde é? pois ven e pregunta, paga a pena subir, verás que paisaxe!

E o alumnado de Infantil encheu á escola cos seus debuxos. Coidar a natureza é unha tarefa de todos e un bo xeito de demostrar o aprecio pola nosa terra.Mira este libro do seu traballo.

Seis ideas arredor da lingua de Victor Freixanes

2010-03-21T13:24:00.000-07:00

Interesante artículo de opinión escrito na Voz de Galicia por Víctor Freixanes

(Premer na imaxe para mais información do autor)

Alguén dirá que volvemos outra vez enriba do mesmo. Pois non está mal que volvamos. E deberiamos facelo todos os que temos algo que dicir, nesta cuestión e noutras. A opinión non se constrúe cun único discurso. Se algo positivo podemos tirar da deboura en que estamos (presente e futuro da lingua galega) é a posibilidade de que exista debate social. Non esquemas, que desgraciadamente é o que máis abunda. Ideas.
Primeira idea. A lingua somos todos, igual que a sociedade somos todos. Deixar fóra do debate a aqueles que non pensan coma nós é, ademais dun principio antidemocrático, unha simpleza, un reducionismo que nos empobrece. Isto serve tamén para os que pensan que aplicando a apisoadora dos votos (ben apretados, por certo) xa todo está resolto.
Segunda idea. A política lingüística, se queremos afrontar en serio o futuro do idioma, non pode ficar reducida ao sistema educativo. A educación (capacitación dos cidadáns para o coñecemento do idioma) é un eido fundamental, pero non exclusivo. A escola é unha parte do debate. Hai que actuar socialmente: deseñar unha política de recoñecemento, prestixio e uso social da lingua en todos os ámbitos, en todos os sectores da sociedade. O Goberno debe avanzar nesta dirección.
Terceira idea. Os que cuestionamos a consulta vinculante ás familias para establecer programas e deseños educativos, que en bo criterio corresponden ás autoridades responsables da planificación, non estamos en contra de escoitar e mesmo atender as voces da diversidade social. O que cuestionamos é a operatividade das propostas que se están a facer, e defendemos unha idea que nos parece fundamental: a educación e, por tanto, a formación dos futuros cidadáns afecta non só aos pais e ás nais que teñen rapaces na escola, senón ao conxunto da sociedade (mesmo aos que non teñen fillos). Estes tamén teñen algo que dicir. Pagan impostos coma os demais.
Cuarta idea. As institucións son (ou deben ser) libres para expoñer os seus posicionamentos. Non son correas de transmisión de ninguén, senón voces complementarias, debemos supoñer que autorizadas. Podemos atender ou non as súas recomendacións, pero non me parece xusto pretender descualificalas porque non están na nosa corda, moito menos porque non emiten na dirección que lle convén ao Goberno.
Quinta idea. O que vive unha situación desigual (no caso do galego unha situación historicamente desigual) precisa dun tratamento desigual para restablecer o equilibrio. Non recuperaremos o uso social da lingua sen unha política activa a prol do idioma máis desprotexido. Está en todos os documentos solventes, empezando pola Carta Europea das Linguas, moi explícita ao respecto.
Sexta idea, non por repetida menos importante. O consenso non é unha antigalla. En determinadas cuestións estratéxicas (pensadas non a curto prazo, senón con perspectiva de futuro) o consenso é unha posición básica, unha mostra de intelixencia política, mesmo de xenerosidade, nunca unha claudicación.

Carta aberta de Xabier Docampo a Anxo Lorenzo

2010-03-17T16:17:00.000-07:00

Xabier Docampo, mestre e escritor, adícalle a Anxo Lorenzo, Secretario de Política Lingüística unha carta desde a súa columna do xornal VIEIROS

Carta aberta a don Anxo Lorenzo
18:12 15/03/2010
(Cómplice necesario da afrenta que se lle vai facer á lingua galega)

Sr. Lorenzo: Acabo de ler as súas desafortunadas declaracións en Faro de Vigo e La Opinión. Por certo, constato que ou fai estas declaracións á prensa en castelán ou non é capaz de esixir, como cómpre tendo en conta o seu cargo, que sexan publicadas en galego; se cadra, ten que facer méritos para lle demostrar a ben sabemos quen, que xa é un bo converso. Logo de lelas, debo dicirlle que vostede mente; ou sexa, di algo que sabe que non é certo co ánimo de enganar aos galegos e ás galegas. E antes de continuar, voulle demostrar que isto é así.

Di vostede que “El problema es que no existe cobertura legal para obligar a nadie a hablar o escribir en gallego. Esto ya lo advirtió el Consello Consultivo en 2007”. Vostede coñece, é imposíbel que o ignore, que o Tribunal Superior de Xustiza de Galicia, na súa sentenza 1084/2007, rexeita o ditame do Consello Consultivo de Galicia e declara que é perfectamente legal que “Nas áreas, materias ou módulos impartidos en lingua galega, o alumnado utilizará, con carácter xeral, o galego nas manifestacións oral e escrita.” Por non falar das numerosas ocasións en que o Tribunal Constitucional avalou a pertinencia desta utilización nas aulas, como vía para a súa aprendizaxe.

Dicir o contrario é mentir e, por aquilo de que quen fai un cesto fai un cento se lle dan varas e tempo, dedúcese que dun mentireiro pouco máis podemos agardar que mentiras.

Di vostede “La ley no permite obligar a hablar gallego”. Pode, daquela, a lei obrigar a aprendelo nas clases de galego? Pode obrigar a lei a aprender a táboa de multiplicar? O que se aprende e usa na escola ten que estar explicitamente escrito na Constitución? Se a competencia nunha lingua só se adquire utilizándoa, como a han adquirir logo? Acaso por ciencia infusa? Son vostedes un fato de mentireiros e uns trapalleiros. Entregaron a súa alma ás minorías negacionistas cunha obscenidade escandalosa.

O seu decreto está envolto na mentira, na falsidade dos datos e das expectativas. Está feito sabendo que os alumnos e alumnas de familias castelán falantes nunca acadarán unha competencia mínima en galego. Está, pensado desde os privilexios de clase, feito para satisfacer os desexos antigalegos dun sector dos pais do alumnado do ensino privado (o de concertado non é máis que un uso indebido de medios públicos, mentres obriguen por vía de achegas “voluntarias” a pagar unha cantidade mensual complementaria).

Sr. Lorenzo, vostede, ao se facer reo voluntario da política etnocida do Sr. Feijoo, saberá canto lle pagou a pena botar pola xurreira abaixo unha carreira profesional merecente de todo respecto. Agora só fica para vostede a indignidade de ser, en complicidade con Falange Española de las JONS (vostede escribiu este decreto ao ditado do que eles demandaron en Compostela en febreiro de 2009), quen pasará a historia como a persoa que defendeu o maior ataque legal contra a lingua propia de Galicia desde Francisco Franco (que tamén era “gallego y de Falange”). Lamento moito ter que dicilo, pero a súa traizón cóbreo de indignidade. O seu cometido e desexo non foi nunca, agora o entendo, o de estabelecer un marco legal que substituíse ao mesmo decreto 124/2007 que defendeu publicamente; vostede foi encargado de lle dar unha aparencia científica e legal á mentira, o engano, a traizón. Non teño xa que escoller ningún cualificativo para lle aplicar, dedúcense doadamente do seu proceder.

Pero, de todos os xeitos, permítame que lle diga que aínda podería recuperar en boa parte a dignidade perdida (só os que nunca a tiveron non poden recuperala). Dimita. Abandone o barco onde xa só fican ratas. Déixeos sos. Dígalles que vostede non pode amparar semellante barbaridade, que non pode traizoar unha institución que, antes ca vostede, ocuparon outros e, uns máis e outros menos, todos foron facendo cousas, sempre avanzando por pouco que fose. Dígalles que non quere ser lembrado como único responsábel de Política Lingüísitca que fixo retroceder o galego nos seus dereitos. Que o fagan eles se queren, non se suicide socialmente, regrese á comprensión dos seus que, máis tarde ou máis cedo, sempre han entender que foi capaz de ter dignidade á última hora. Destes só pode agardar que o deixen tirado na cuneta (estilo falanxista) cando pensen que xa non lles serve. É difícil, pero mentres non estea o decreto no DOG sempre estará a tempo de merecer o respecto dos galegos e das galegas de hoxe e de mañá.

Despois xa nunca o poderá ter. Máis tarde ou máis cedo o seu decreto tamén será derrogado, cambiase por outro e deste só ficará a ignominia.

En calquera caso, non siga a mentir, que nin vostede nin eu nacemos onte.

6º na Granxa Escola de Barreiros, Lugo

2010-03-16T05:46:00.000-07:00

O alumnado de 6º foi pasar uns días da pasada semana á Granxa escola de Barreiros, no concello lucense de Sarria. Fotos e un video recollen para vos esta experiencia.

Declaración da Plataforma ProLingua sobre do avance de Decreto (chamado) de Plurilingüismo da Xunta de Galicia

2010-03-14T13:46:00.000-07:00

… E se os feitos demostran outra cousa, haberá que cambiar os feitos. Esta falsificación diaria do pasado, realizada polo Ministerio da Verdade, é tan imprescindible para a estabilidade do réxime como a represión e a espionaxe efectuadas polo Ministerio do Amor.

A referencia ás palabras de Orwell é obrigada despois de ler na páxina oficial da Xunta de Galicia o avance do “Borrador do decreto de plurilingüismo no ensino público non universitario”. Desde ProLingua denunciamos a pretensión de falsificar a realidade presente nun texto que consuma a peor agresión contra a lingua galega desde o franquismo evidenciando a vontade de desfacer os tímidos avances normalizadores do período constitucional. Unha vez se faga público o texto completo deste borrador de decreto, desde ProLingua procederemos a unha análise polo miúdo do seu contido. Agora, nesta declaración de urxencia, facemos público o seguinte:

(ler mais)http://prolinguagalega.org/

Resposta da Coordinadora Galega de ENDL ó Anteproxecto do Decreto do Bilingüísmo

2010-03-14T13:34:00.000-07:00

O Anteproxecto do Decreto do Bilingüismo discriminará a lingua galega no ensino e provocará serios conflitos na comunidade educativa

O novo decreto non garantirá o equilibrio efectivo entre as dúas linguas oficiais no ensino e desprotexe o galego, especialmente na etapa de infantil.
O avance do anteproxecto relega a promoción da lingua galega ás actividades de fomento e ao compromiso persoal do profesorado.A Coordinadora Galega de ENDL valora negativamente que o Anteproxecto do Decreto do Plurilingüismo, cuxas liñas xerais deu a coñecer onte a Consellería de Educación, non desenvolve os preceptos da Lei de Normalización Lingüística (LNL) como si facían os decretos anteriores. Así, unha lexislación que debería desenvolver a LNL, creada para protexer a lingua propia de Galicia que está en situación de desequilibrio social respecto do castelán, ponlle límites á súa normalización no ensino: por un lado, establece máximos na distribución horaria para o galego cando nunca se cumpriron os mínimos marcados nos Decretos 247/1995 e 124/2007; e, por outro lado, afonda nos prexuízos cara a unha lingua que está en retroceso ao transmitir que non é válida para todos os campos do saber posto que impide que sexa a lingua vehicular para as materias do ámbito científico-tecnolóxico.

(ler mais)http://www.coordinadoraendl.org/entrada.php#ancc

Esta semana Gabriel co seu "wanamino"

2010-03-12T05:42:00.000-08:00

Disfruta en familia este fin de semana

2010-03-12T02:56:00.000-08:00

Chegaron á escola dúas informacións para interesantes actividades:

Carreira popular por Haití: O domingo 14 ás 12 da mañán. saída do Embarcadoiro de Combarro ou a Praza da Granxa (Campelo) e chegada á Explanada da Seca. ademáis da Carreira ou marcha haberá diferentes atraccións. A inscripción (instalada nos puntos de saída a partir das 11) será de 3 € adulto e de 1 € por neno. A recadación irá integramente destinada a labores de postemerxencia e reconstrucción no Departamento Sudeste de Haití. Organiza Solidariedade Internacional en colaboración co Concello de Poio.

Concerto de clausura do Salón do libro de Pontevedra: O domingo 14 ás 12 da mañán no Pazo da Cultura de Pontevedra. Concerto de presentación do libro CD "A nena e o grilo" de OQO editora.

O chiste da semana

2010-03-06T12:09:00.000-08:00

Cada venres un chiste para comezar ben o fin de semana...
Esta semana tócalle a Francis

2010-03-05T01:51:00.000-08:00

Neste curso presentouse o "Iº Concurso de Fotografía CEIP de Chancelas" no que participaron nenos e nenas do terceiro ciclo. Baixo o tema "O noso mar" xurdiron moreas de fotografías que remataron recollidas nun precioso libro, hoxe na nosa biblioteca. Aqui tedes unha boa mostra da nosa paisaxe e do noso traballo fotográfico.

Imos a ONS

2010-03-05T01:36:00.001-08:00

Este é o cómic que fixemos os de 5º e que, seleccionado polo Patronato do Parque Nacional das Illas Atlánticas, nos fixo gañar unha viaxe á Illa de Ons o vindeiro mes de abril.
Imos percorrer a illa, coñeceremos a súa fauna e flora e disfrutaremos da súa paisaxe e das súa praias. Xa vos contaremos á volta como foi a experiencia.

Samaín 30 outubro 2009.

2010-02-26T04:57:00.000-08:00

Unha nova viaxe

2010-02-25T06:34:00.000-08:00

Esta vai ser a nova viaxe do ENDL do CEIP de Chancelas, en Combarro,Poio.
Recolleremos aqui as novas e actos na escola relacionados coa difusión e promoción da nosa lingua, EN GALEGO.